بە خەم و پەژارەیەکی قووڵەوە، هەواڵی تێرۆرکردنی تێکۆشەر و داکۆکیکاری ناسراوی مافەکانی ژنان، هاوڕێ یەنار محەمەد، (سەرۆکی ڕێکخراوی ئازادی ژن لە عێراق و ئەندامی کۆمیتەی ناوەندی ڕێکخراوی بەدیلی کۆمۆنیستی لەعێراق) مان پێگەیشت، کە بەیانی ئەمڕۆ لە شاری بەغداد لەلایەن دەستێکی ڕەشی دژە ئازادییەوە ئەنجامدراوە.

ئێمە لە “ناوەندی ئازادی و ژیان“، وێڕای دەربڕینی سەرەخۆشی و هاوخەمیمان بۆ هاوڕێیانی لە ڕێکخراوی ئازادی ژن و ڕێکخراوی بەدیلی کۆمۆنیستی و خانەوادەو بنەماڵەکەی ، هاوکات بە توندی ئەم تاوانە ترسنۆکانەیە سەرکۆنە و شەرمەزار دەکەین.

ئەم کردەوە تێرۆریستییە، هێرشێکی ڕاستەوخۆیە بۆ سەر بەهاکانی ئازادی و مافەکانی ژنان و هەوڵێکی شکستخواردووە بۆ کپکردنی دەنگی یەکسانیخوازی ژنان و ئەم تاوانە چەپەڵە گەواهیدەری ترسی قووڵی تاریکپەرستانە لە ئازادی و یەکسانی.

داواکارین ئەنجامدەران و دەستە ڕەشەکانی پشتی ئەم تاوانە بە زووترین کات ئاشکرا بکرێن و ڕووبەڕووی سزای یاسایی بکرێنەوە. دڵنیاین کە تێکۆشانی یەنار محەمەد ناوەستێت و مەرگی ئەو دەبێتە وزەیەکی زیاتر بۆ بەردەوامی خەباتی ژنان و پیاوانی ژیانخوازو یەکسانیخواز.

یادی هاوڕێ یەنارمحمەد هەمیشە بە زیندوویی دەمێنێتەوەو ڕیسوایی و شەرمەزاری دەبێتە بەشی بکوژان و دووژمنانی ئازادی.

ناوەندی ئازادی و ژیان

    ٢ / ٣ / ٢٠٢٦