عەلی مەولود

سووریا ئەمڕۆژانە گۆڕانکاری ناخهەژێن بەخۆوە دەبینێت، “تیرۆریزمی دەوڵەتی” و هێرشی گرووپە ئیسلامیە توندڕەوەکانی سەر بە حکومەتی کاتی سوریا، کە بە نەخشە وهاوکاری ئەمریکاو ئیسرائیل هاتنە سەرکارو جێگەی دەسەڵاتی رەشی ئەسەدیان گرتەوە، لە چوارچێوەی ستراتیژییەکی فراوانتر لەو بیانووانەی بۆ رێکخستنەوەی سوریای نوێ باسدەکرێن، دەچێتەپێشەوە و بەهاندان و دەست لەپشدان و پشتیوانی راستەوخۆی دەوڵەتی تورکیاو لەسێبەری چاوپۆشی و بێدەنگی کۆمەڵگەی نێوەدەوڵەتی، بەڕێوەدەچیت و ئامانجە سەرەکییەکانی بریتین لە:

١- تێکدانی خەون و خولیای سەربەخۆیی و چارەسەری پرسی کورد بە شێوەی ئینسانی و دیموکراتی. رەتکردنەوە و ڕێگریکردن لە دروستبوونی هەرجۆرە کیان و قەوارەیەکی سەربەخۆ یان فیدراڵی بۆ خۆبەڕێوەبەری کورد.

٢- شکاندنی ئەزمون و مۆدێلی خۆبەڕێوەبەری رۆژاڤا، کە یەکسانی نەتەوەکان، ئازادی ژن و دیموکراسی راستەوخۆی کردووە بە پەیام و پەیڕەوی خۆی و هێزە ستەمکارو کۆنەخوازەکان بە هەڕەشەی دەزانن بۆسەر خۆیان.

٣- گیڕانەوەی سوریا بۆ سیستەمێکی تاک‌دەسەڵاتی و دەوڵەتیکی ناوەندی بەهێز، کە هەژمونی لە هەموو سوریادا هەبێت و گەلانی سووریا و یەکپارچەیی خاکی سووریا بخاتەوە ژێر ئاڵای عروبە و ئەزموونی خۆبەڕێوەبەری ڕۆژاڤا وەک مەترسیەک بۆ سەر ئەو ئامانجە شۆڤێنیە کەنار بخات.

٤- لاوازکردن و پارچەکردنی هەسەدە و گۆڕینی هاوسەنگی هێز لە باکووری سوریا بە قازانجی گرووپە تیرۆریستیەکانی سەر بە تورکیا و خەلافەتخوازەکان و کۆنترۆڵکردنی ناوچە ستراتیژییەکانی ژێر دەسەڵاتی هەسەدە، تا بتوانن خۆیانی تێدا ڕێکبخەنەوە بۆ ئامانجی سیاسی جۆراوجۆرو ژێربەژێر.

٥- لاوازکردنی پێگەی کورد لە دانوستانەکان و ناچارکردنی خۆسەری رۆژاڤا، کە بە لاوازی بچێتە ناو هەر ڕێککەوتنێکی سیاسی لە سووریای نوێدا، کەمکردنەوەی کاریگەری پەکەکە لەناوچەکە لەڕێگەی لێدان لە رۆژاڤاوە.

٦- دروستکردنی “ناوچەی ئارام لەسنوورەکانی نێوان رۆژاڤاو تورکیا بۆ نیشتەجێکردنی ئەو پەنابەرە عەرەبە سوریانەی لە تورکیاوە دەگەڕێنرێنەوە، بەمەبەستی گۆڕینی زیاتری دیمۆگرافیای ناوچە کوردیەکان.

٧- …..

هەڵوێستەکانی ئەمریکا و لێدوانەکانی تۆم باراک (نوێنەری ئەو وڵاتە لەسوریا) ڕاستەوخۆ بە قازانجی پراتیک کردنی ئەو خاڵانەو بەدژی داهاتووی ڕۆژاڤا شکاوەتەوە، ئەو دەربڕینەی باراک کە دەڵێت: پەیوەندی ئەمریکا و هەسەدە تەنها “رێککەوتنێکی سەربازی بووە بۆ تێکشکاندنی خەلافەتی داعش و ئیتر ئەرکەکە تەواو بووە و ئەمریکا هیچ پابەندییەکی ئەخلاقی یان سیاسی نییە بۆ پاراستنی قەوارەیەک بۆ کورد، راستەوخۆ بەواتای چاونوقاندنیەتی لە پێشێلکردنی ئاشکرای مافە رەواکانی گەلێک.

ئەوە پێمان دەڵێت تورکیا وەک ئەندامێکی ناتۆ و هێزێکی ناوچەیی، بۆ بەرژەوەندییەکانی ئەمریکا زۆر گرنگترە لە ئینسانیەت و لەهێزێکی وەک هەسەدە و پێکهاتێکی ئیتنیکی وەک کورد. باراک بەراشکاوی هەوڵدەدات بەهۆی خۆبەڕێوەبەری رۆژاڤا، پەیوەندییەکانی ئەمریکا لەگەڵ تورکیا تێک نەچێت و لەو پێناوەدا دەڵێت ” ئەمریکا قەرزاری کورد نیە و پشتیوانی بۆ هەسەدە و رۆژاڤا کۆتایی هاتووە ” و ترەمپ بێشەرمانە و بازرگانانە دەڵێت هاوکاری ئەوانمان بە پارە بەدەستهێناوە. وتنی ئەم قسانە لە کاتێکی هەستیاری وەک ئێستادا، بەکردەوە هەڵکردنی گڵۆپی سەوزە بۆ تورکیاو هێزە تاریکپەرستەکانی سوریاو ئاماژەیەکە بۆیان کە دەتوانن هێرش بکەن و لە بێدەنگی ئەمریکا دڵنیا بن، ئەوە لەکاتێکدا نەمانی رۆژاڤاو لاوازبوونی هەسەدە، دەبێتە هۆی روودانی کارەساتی مرۆیی دڵتەزێن و شەرماوەر بۆ جیهانی هاوچەرخ.

سیستەمی سەرمایەداری هەر لەسەرەتاوە کوردی قبوڵ نەکرد و لەهەموو توندپێچێکدا هەڵیدەهاوێ، ئەم هەڵاواردنە لە رووداوەکانی رۆژاڤادا گەیشتووە بەوەی هێزی توندڕەوی ئیسلامیی لەگەڵ گەورە دوژمنی وەک ئیسرائیل و گەورە شەیتانی وەک ئەمریکا هاوپەیمانی بکات و کورد و ئامانجە رەواکانی وەکو دوژمنی هاوبەش ببینن.

کاردانەوەی شەقامی کوردی و زۆرینەی هێزە سیاسیەکان بەرامبەر بەم دۆخەی پێشهاتووەو بەرامبەر ئەوەی روودەدات، وێرای نیگەرانییەکی قووڵ، هاوکات هەوڵدانێکیشی لێ کەوتۆتەوە بۆ دۆزینەوەی بەدیلی پشتبەخۆبەستن، بۆ ئازادی و پاراستنی مافە کلتووری و سیاسی و کارگێڕیەکانی گەلی کورد، بۆ ئەو مەبەستەش گوتاری “خۆبەهێزکردن وەک یەک بلۆکی سیاسی” زۆر تۆخ بۆتەوە و لەسەر ئاستێکی فراوان دەرک بەوە کراوە کە  لە سیاسەتی ئەوروپاو رۆژئاوادا هەمیشە “بەرژەوەندی” پێش “وەفا و مۆراڵ و ئینسانیەت” دەکەوێت و تەنانەت وەفادار نین بەو بانگەشەو بەڵێنانەی داویانەو لەڕێگایەوە پشتبەستوو بە هێزی دارایی و سەربازی، دەستوەردان لەوڵاتاندا دەکەن.

ئەم هێرشانە بۆ سەر رۆژاڤا، تەنها هێرشێکی سەربازی نیە بۆسەر هێزێکی سیاسی و دەسەڵاتێکی خۆجێیی، بەڵکو هاوکات هێرش و پەلاماردانێکی دژی ئینسانیە بۆ سەر: مافی دیاریکردنی چارەنووسی گەلێک، خواستی خۆبەڕێوەبەری، یەکسانی گەلان و پێکەوەژیانی ئازادانەی پێکهاتە جیاوازەکان، ئەم شەڕفرۆشیە ئەوەندە قین لەدڵانە و شۆڤێنیستانەیە کە تەنانەت رێککەوتن و ئاگربەستەکانیش نایوەستێنێت و تێنوێتییان بە فەتوای قڕکردن دەشکێنن.

خۆبەڕێوەبەری رۆژاڤا، سەرەڕای ئەوەی لە ئێستادا بەهۆی گەلەکۆمەی ناوچەیی و نێودەوڵەتی لە دۆخێکی سەختدایە؛ بەڵام سەرسەختانە. و بەرپرسیارانە ڕووبەڕووی هێرشەکان و ئاڵەنگاریەکان وەستاوەو خۆڕاگری و بەرەنگاری دەکات و پارێزگاری لە دەستکەوتەکانی  “خۆبەڕێوەبەری و فرەیی و ژیانی ئازاد ” دەکات. هەربۆیە پشتیوانی و بەرگری لەم تێکۆشان و بەرەنگارییە پێویستییەکی مرۆیی و سیاسییە و بەرگرییە لە داهاتوویەک کە سەروەری مرۆڤ و ئازادی و ژیان و ئاشتی تیایدا سەنتەرە. ئەو پشتیوانیە جەماوەری وشەعبییە فراوانەی لێی دەکرێت بەتەواوی شایستەیە.