نوسینی: جەمال حەمید
بەیانیت باش
ئەی لەپشەقاربووی ئیشی سەخت
پشت چەماوەی
دەستی یاسای کاری ناوەخت!
چەند کلێنسکم بەرێ
با ئارەقەی شەرمەزاری نێوچاوانی
گشت بەشەرییەتی پێ بسڕم!
با بەرلەوەی
هەڵۆیی مەرگ
چڕنووک لە هەناسەت گیرکا
منیش لە مەراقدا بمرم!
میهرەبانترین ڕیشچەرمووی ئەم دونیایە
دەزانم خاوەنی هیچ نیت
بێجگە ئەو
چەند هەزارە تەبعە دڕاوەی
لە گیرفانی چەپتدایە!
بەیانیت باش
ئەی لەپشەقاربووی ئیشی سەخت
پشت چەماوەی
دەستی یاسای کاری ناوەخت!
Leave a Comment
Your email address will not be published. Required fields are marked with *